Nýsköpunarmiðstöð Íslands býður húseigendum og iðnaðarmönnum á námskeið um viðhald og verðmæti fasteigna sem haldið verður á nokkrum stöðum um landið í vetur. Viðhald og verðmæti er samstarfsverkefni Nýsköpunarmiðstöðvar og Íbúðalánasjóðs við sérfræðinga frá verkfræðistofum, Orkusetrinu, Rafiðnaðarskólanum, Húsi og heilsu, Iðunni - fræðslusetri og heimamenn í hverjum landshluta fyrir sig.

Á námskeiðinu er fjallað um mikilvæga viðhaldsþætti svo sem raflagnir, leka, loftgæði, húsasótt, hitastýringu, orkunotkun og mat á viðhaldsþörf. Þátttakendur geta valið um og flakkað á milli fjögurra málstofa sem allar tengjast viðhaldi og vörslu þeirra verðmæta sem felast í húseignum. Þátttökugjald er ekkert og allir velkomnir.

Fyrsta námskeiðið verður haldið í Menningarhúsinu Hofi á Akureyri miðvikudaginn 8. september frá kl. 14:00 - 18:00 .

Í lok námskeiðs kl. 16:45 verður slegið upp tengslatorgi þar sem þátttakendum gefst tækifæri til að fá svör og ráðgjöf hjá sérfræðingum. Á torginu í Hofi munu fjölmargir iðnmeistarar, verkfræðistofur, bankar og þjónustuaðilar í byggingariðnaði veita upplýsingar og fræðslu um allt sem lýtur að viðhaldi, endurbótum á húsnæði og að auknum lífsgæðum á heimilum og vinnustað.

Nánari upplýsingar, m.a. um dagskrá og skráningu má finna á vefslóðinni: http://nmi.is/impra/namskeid/vidhald-og-verdmaeti/